Abshir Aaden Feerro oo ah hogaamiyaha Isbaheysiga Mustaqbalka Xisbsiga ayaa ku baaqay wada-hadallo midnimo Qaran oo lagu qabanayo Xarunta Golaha Wadatashiga Qaran ee Muqdisho, kaas oo looga gol leeyahay in meel looga soo wada jeesto caqabadaha Soomaaliya ka jira.
Abshir oo khudbad ka jeediyay shirka golaha wadatashiga qaran ayaa ku nuux nuuxsaday muhiimadda ay leedahay midnimada madaxda federaalka iyo kuwa dowlad goboleedyada Soomaaliya. Wuxuu ku booriyay inay danaha qaranka ka hormariyaan ta shaqsi, qabiil iyo mid kooxeed, isagoo ku nuux-nuux saday in midnimadaasi ay lagama maarmaan u tahay sidii looga gudbi lahaa halgankii faraha badnaa ee uu dalka soo maray.
“Marka midnimadiina ay salka ku hayso u adeegidda qaranka aad ballan ku qaadaysaan inaad ilaalinaysaan, idinka oo danta guud ka hormarinaya danta shaqsi ama qabiil, waxaad bulshada Soomaaliyeed u hagi doontaan mustaqbal ifaya,” ayuu yiri Abshir.
Waxa uu ka digay in haddii aan la helin midnimo iyo wadaninimo dhab ah in Soomaaliya caqabadaha joogtada ah ay kasii dari karaan, taasoo dalka u horseedi karta dhibaato. Baaqa Abshir ee ku aadan in hal meel looga soo wada jeesto ayaa ah mid uu si toos ah uga codsanayo madaxda in ay meel iska dhigaan kala qeybsanaanta oo ay meel uga soo wada jeestaan u adeegida shacabka Soomaaliyeed.
La Xisaabtanka Hoggaanka iyo Ballanqaadka
Abshir waxa uu sidoo kale tilmaamay baahida muhiimka ah ee loo qabo in madaxdu ay kobciyaan kalsoonida labada dhinac, ayna muujiyaan go’aan dhab ah oo ku aaddan danaha dalka. Soomaaliya, ayuu tilmaamay in muddo dheer ay ragaadiyeen colaado, faqri, gaajo, jahli iyo dowlad-xumo, kuwaas oo dhammaantood caqabad ku noqday horumarka.
“Dalku dhibaato badan ayuu soo maray, waxaa la joogaa xilligii aan rajo gelin lahayn oo aan soo bandhigi lahayn aragti ka gudubta halganka hadda jira, taasna waxaa lagu gaari karaa daacadnimo, ujeedo dhab ah, iyo in ay ka go’an tahay u adeegidda shacabka Soomaaliyeed,” ayuu yiri Abshir.
Hogaamiyaha Xisbiga Isbaheysiga Mustaqbalka ayaa sidoo kale ugu baaqay muwaadiniinta Soomaaliyeed in ay ka tashadaan aayaha ummadooda. Waxa uu shacabka ku booriyay in ay ku dadaalaan dhismaha midnimada qaranka, kobcinta waddaniyadda, iyo la xisaabtanka madaxda wax qabadkooda.
"Kuwa hoggaanka haya waa in lagula xisaabtamaa mas'uuliyadahooda, iyadoo la hubinayo inay u adeegaan shacabka Soomaaliyeed halkii ay u adeegi lahaayeen qorshahooda gaarka ah," ayuu Abshir hadalkiisa ku daray.
Wax ka qabashada Caqabadaha Degdegga ah ee Soomaaliya
Golaha Wadatashiga Qaran oo uu shir guddoominayay Madaxweyne Xasan Sheekh Maxamuud, ayaa ka hadlay arrimo muhiim u ah dowladnimada, oo ay ku jiraan hannaanka doorashooyinka mustaqbalka. Si kastaba ha ahaatee, Abshir waxa uu xasuusiyay madaxda in caqabadaha ugu waaweyn ee Soomaaliya ka jira – amniga, fursadaha shaqo, xiisadaha kala dhexeeya Somaliland, iyo iskahorimaadyada socda ee kooxaha sida al-Shabaab ay weli yihiin walaac degdeg ah oo u baahan in si degdeg ah wax looga qabto.
Iyadoo ay jiraan caqabadahaas waaweyn, Abshir waxa uu rajo wanaagsan ka muujiyay in haddii la helo hoggaan sax ah iyo mid midaysan, ay Soomaaliya ka gudbi karto caqabadaha hadda jira, ayna dhisi karto mustaqbal ka shaqeeya danaha dhammaan shacabkeeda.
